Факультэт народных інструментаў

Дэкан – дацэнт С.І. Кафанаў

Кафедры:

Дзейнасць аддзялення народных інструментаў Беларускай дзяржаўнай кансерваторыі пачалася ў 1937 г. Менавіта тады быў адкрыты клас народных інструментаў, дзе праходзілі навучанне студэнты па спецыяльнасцях "цымбалы", "баян", "домра" і "балалайка". У 1939 г. на Усесаюзным конкурсе выканаўцаў на народных інструментах вялікага поспеху дасягнулі цымбалісты Аркадзь Астрамецкі (ІII прэмія), Іосіф Жыновіч (ІІ прэмія), дамрысты Мікалай Лысенка (ІІІ прэмія) і Георгій Жыхараў (дыплом). У 1949 г. была арганізавана кафедра народных інструментаў, якую узначаліў выдатны цымбаліст-віртуоз, заснавальнік беларускай прафесійнай цымбальнай школы, мастацкі кіраўнік дзяржаўнага аркестра БССР Іосіф Жыновіч, у далейшым удастоены ганаровага звання народны артыст СССР, вучонага звання прафесар і Дзяржаўнай прэміі БССР. Пасля І. Жыновіча кафедрай таленавіта і плённа кіравалі такія вядомыя музыканты, як дацэнт Г. Жыхараў і заслужаны дзеяч мастацтваў РБ, прафесар М. Солапаў. Вялікі ўклад у развіццё айчыннага выканальніцтва на балалайке ўнёс дацэнт М. Прашко.

У значнай ступені вычэбна-выхаваўчая, навукова-даследчая, творчая і метадычная работа аддзялення народных інструментаў актывізавалася пачынаючы з 1980 г., пасля раздзялення кафедры народных інструментаў на кафедру баяна-акардэона і кафедру струнных народных інструментаў.  

Кафедра баяна і акардэона. Станаўленне айчыннай школы баяна звязана з педагагічнай дзейнасцю Э. Азарэвіч. У ліку вядучых выкладчыкаў кафедры баяна і акардэона – яе загадчык, заслужаны артыст РБ, прафесар М. Сеўрукоў, заслужаны дзеяч мастацтваў РБ, прафесар М. Солапаў, кандыдат мастацтвазнаўства, прафесар В. Чабан, в.а. прафесара Б. Сінецкі, В. Пісарчык, дацэнты Т. Брагінец, М. Була, якія паспяхова працягваюць традыцыі баяннага выканальніцтва на Беларусі. Таленавітыя студэнты кафедры пачалі сістэматычна удзельнічаць у міжнародных выканальніцкіх конкурсах. Многія з іх сталі пераможцамі найбольш прэстыжнага міжнароднага конкурса у г. Клінгенталі (ФРГ): гэта І. Атраднаў, А. Мацкевіч, В. Людчык, А. Шувалаў, У. Плігаўка, дуэт у складзе І. Атраднага (баян) і М. Марэцкага (мандаліна), дуэт акардэаністак Н. Слюсар і А. Зыбо, дуэт баяністак С. Вайтовіч і В. Іванюк. Выступленне на міжнародным конкурсе ў г. Кастэльфідарда (Італія) прынеслі перамогі Б. Біочыч, Дз. Атраднаву, У. Плігаўке і інш. Высокія ўзнагароды атрымлівала трыа баяністаў "Мінск", якім кіруе прафесар В. Пісарчык. У апошнія гады лаўрэатамі міжнародных конкурсаў неаднаразова станавіліся А. Шувалаў, І. Квашэвіч, К. Тарасенка, А. Дараганаў, І. Каленчыц, У. Плігаўка і інш.

  Кафедра струнных народных інструментаў. Міжнароднае прызнанне атрымала беларуская школа цымбалаў, ля вытокаў якой стаяў таленавіты выканаўца прафесар І. Жыновіч. Сярод яе выдатных прадстаўнікоў – народны артыст Беларусі, прафесар Я. Гладкоў (загадчык кафедры), в.а. прафесара Т. Сяргеенка, дацэнты Т. Ялецкая і Р. Падойніцына. Плённую выхаваўчую, творчую і навукова-даследчую работу вядуць на кафедры заслужаная артыстка РБ, прафесар Г. Асмалоўская (домра), кандыдат мастацтвазнаўства, дацэнт В. Шчарбак (балалайка), в.а. прафесара В. Жывалеўскі (гітара), в.а. дацэнта Я. Грыдзюшка (гітара), Л. Чарняк (домра), М. Марэцкі (домра), старшы выкладчык М. Iльіна (балалайка). 3 найбольш вядомых выхаванцаў кафедры струнных народных інструментаў трэба назваць шырока вядомых маладых беларускіх выканаўцаў-цымбалістаў – заслужаную артыстку РБ Л. Рыдлеўскую, В. Мішулу, А. Ткачову, С. Загуменкіну, Ю. Кузьменку, К. Анохіну, М. Лявончыка, А. Карпенку, Н. Кавалеўскую-Аруцюнаву і Т. Шумакову; дамрыстаў В. Дубоўскую, А. Дзікавіцкую, К. Пракопчык; гітарыста Я. Скрыгана i інш.

Вялікую канцэртную дзейнасць вядуць ансамбль цымбалістаў «Лілея» (мастацкі кіраўнік – Я. Гладкоў), ансамбль дамрыстаў (мастацкі кіраўнік – Г. Асмалоўская), ансамбль балалаечнікаў (мастацкія кіраўнікі – В. Шчарбак і М. Iльіна).

Кафедра аркестравага дырыжыравання. Адным з заснавальнікаў мастацтва аркестравага дырыжыравання быў І. Мусін. Станаўленне гэтай спецыяльнасці ў 1950–70-я гг. звязана з імёнамі І. Гітгарца, В. Дуброўскага, В. Катаева, С. Ратнера, М. Шнэйдэрмана, Ю. Яфімава. На працягу шэрага гадоў з кафедрай плённа супрацоўнічаюць вядомыя дырыжоры: народны артыст Расіі, прафесар Г. Праватораў, заслужаны дзеяч мастацтваў РБ М. Калядка, А. Сасноўскі і інш. Сярод выхаванцаў кафедры – плеяда музыкантаў, якія ўнеслі прыкметны ўклад у развіццё музычнай культуры Беларусі, менавіта: народныя артысты Беларусі М. Казінец, М. Фінберг, заслужаныя артысты і дзеячы культуры і мастацтва РБ І. Абраміс, Ю. Васілеўскі, А. Лапуноў, Л. Лях, Л. Іваноў, А. Пальвінскі, Р. Сарока, а таксама М. Алданаў, А. Берын, У. Борматаў, Т. Бялькова, П. Вандзілоўскі, Г. Ермачэнкаў, В. Краўцоў, В. Малых, В. Чарнуха, З. Шацила, О. Лясун, А. Энгельбрехт і інш. Сярод выкладчыкаў кафедры такія музыканты с вялікім вопытам канцэртнай і педагагічнай работы, як народны артыст Беларусі, прафесар М. Казінец, народны артыст Беларусі М. Берсан, дацэнты С. Кафанаў, Б. Чудакоў, З. Шаціла, старшыя выкладчыкі У. Міняеў, У. Чернікаў, В. Чарнуха. На чале з загадчыкам кафедры, дацэнтам П. Вандзілоўскім яны забяспечваюць падрыхтоўку спецыялістаў по спецыялізацыях «дырыжор оперна-сімфанічнага аркестра», «дырыжор камернага аркестра», «дырыжор аркестра народных інструментаў», «дырыжор аркестра духавых інструментаў».

[ Папярэдняя ] [ Наступная ]